Petr dostal rabotu kako veterinar v malom selu blizko Tabora. Do sela ne jezdi vlak i avtobus jezdi tolko dva raza v den. Zato Petr potrěboval avto. Novo avto bylo predrago, i on rěšil kupiti staro.
V subotu on i jego otec pojehali k prodavaču podržanyh avt na kraju Pragy. Na placu stojalo mnogo avt: male, velike, nove i stare. Prodavač pokazal jim modro kombi i črveno malo avto.
Kombi bylo veliko i imalo mnogo města za instrumenty, ale ono bylo staro i potrěbovalo mnogo benzina. Črveno avto bylo mlajše, imalo tolko 80 000 kilometrov i bylo ekonomično. Otec pogledal pod kapot i prověril gumy. Potom Petr testoval avto na ulicě. Motor rabotal tiho i brzdy byli dobre.
Cěna byla 180 000 kron. Petr skazal: «To jest mnogo. Mogu dati 160 000.» Prodavač dolgo dumal i potom ponudil 170 000 i zimne gumy gratis. Petr soglasil se.
V ponedělok on uže jehal na rabotu v novom avtu. Doroga skrozě lěs i polja byla krasna. Na rabotě prvy pacient byla velika krava. Petr se smějal: avto jest malo, ale pacienti sut veliki!